உடலும் உருகாமல் இருக்க என்ன செய்யவேண்டும் கேட்கிறார் ஆழ்வார்

உடலும் உருகுகிறதே என் செய்வேன் அரங்கா !!

அன்றைய சோழ நாடான திருமண்டகக்குடியில் அவதரித்தவர் விப்ர நாராயணர் என்னும் இயற் பெயர் கொண்ட தொண்டரடிப்பொடியாழ்வார். இவர் திருவரங்கம்(ஸ்ரீரங்கம்) வாழ் பெரியப்பெருமாளின் மேல் மட்டுமே காதலாகி..பாடல்களைப் பாடியவர். அவை திருமாலை..திருப்பள்ளியெழுச்சி !

இவை நாலாயிரத் திவ்யப்பிரபந்தத்திலுள்ள முத்துக்கள் !

அந்தப்பாசுரங்களைப்பற்றி இங்கு படித்து வருகிறோம்.

முந்தையப் பாசுரத்தில்...காவிரியின் அழகு , அதன் நடுவேப் பள்ளிக்கொண்டுள்ள பரமனைக்காணும் போது கண்களில் கண்ணீர் பெருக்கெடுக்கிறதே என்ன செய்வேன் என்று புலம்பிப்பாடியிருந்தார்.

இனி அடுத்தப்பாசுரம் காண்போமா ?!

பாசுரம் -19.

குடதிசை முடியை வைத்துக் குணதிசை பாதம் நீட்டி
வடதிசை பின்புக் காட்டித் தென்திசை யிலங்கை நோக்கி
கடல் நிறக் கடவுளெந்தை அரவணைத் துயிலு மாக்கண்டு
உடலெனக் குருகுமாலோ எஞ்செய்கேனு லகத்தீரே

******

குடதிசை - மேற்கு திசை

முடியை வைத்து - தனது திருமுடியை வைத்து (உலகை ஆளும் அரசன்..ஜகத்ரஷன் தனது க்ரீடம் வைத்து)

குண திசை - கிழக்குத் திசையில்

பாதம் நீட்டி - தனது திருப்பாதங்களை நீட்டிக்கொண்டு

வட திசை - வடக்கு திசையில்

பின்பு காட்டி - தனது பின்புற அழகைக்காட்டிக்கொண்டு

தென் திசை - தெற்கு திசையில் உள்ள

இலங்கை நோக்கி - இலங்கையை நோக்கியப்படியே

கடல்நிறக் கடவுள் - கடலைப்போன்ற நிறத்துடன் உடைய மேனியையுடைய கடவுளான

எந்தை - என்னுடைய (கடவுள்)

அரவணைத் துயிலு மாகண்டு - அரவமாகிய பாம்பின் மேல் கண்மூடி துயில்வதைப்போல இருக்கும் அழகைக்கண்டு

உடலெனக்கு - உடல் எனக்கு

உருகும் ஆலோ - உருகாதோ..ஐயோ !

என் செய்வேன் - நான் என்ன செய்யவேன்

உலகத்தீரே - திடமாக உருகாமல் உள்ள சம்சாரிகளே..உலகத்தில் உள்ளோரே !

------**---------

இனி பாசுர விளக்கம் :

உடலும் உள்ளமும் உருகாமல் உள்ள உலகத்தீரே ! மேற்குதிசையில் தன் திருமுடியை வைத்து, கிழக்கு திக்கில் தனதுப் பாதங்களை நீட்டிக்கொண்டும் , வடக்கு திசைக்கு தனது பின்னழகைக்காண்பித்துக்கொண்டும் , தென்திசை இலங்கையை நோக்கியவாறும் ,
கடலைப்போன்ற கரு நீல நிறத்தில் உள்ள எந்தன் கடவுள்..
பாம்பின் மேல் கண் வளர்வதைப்போல யோக நித்திரையில் ஆழ்ந்திருக்கும் அரங்கனது அழகைக்கண்டு , எனக்கு உடலும் உருகுகிறதே ! என்ன செய்வேன் !!

ஆழ்வார்.. இதில் மிகப்பிரமாதமான வார்த்தைப்பிரயோகம் செய்துள்ளார்.

கேட்பவரும் கரையும் வண்ணம்...வஞ்சப்புகழ்ச்சியணியாக நம்மைக்கேட்கிறார்.

உடலும் உள்ளமும் நன்கு திடமாக இருக்கப்பலபல மருந்துகளை உண்டப்படி..திடமாக இறைவனைக்கண்டு..நம் கோரிக்கைகளை வைத்தப்படி திரும்புகிறோம்.அதனால் நாம் சம்சாரிகள்.

ஆனால் ஆழ்வார்கள்..இறைவனின் மேல் பக்திப்பெருகி..ஞானம் வளர்ந்து..அதனால்..அவனைவிட்டு பிரிந்து இருக்க முடியாத நிலை ஏற்பட்டு..அவனைக்கண்டு உருகி அழும்போது..அதில் கரைந்துப்போகின்றனர்.
இங்கு தொண்டரடிப்பொடியாழ்வாரும்..அவ்விதமே முன்பு தானும்.. அவ்விதமே இருந்ததாகவும்.. ஆனால் தற்போது , அரங்கனைக்காண முடியாமல்..கண்களில் நீர் திரையிட்டும் உடல் உருகியும் போவதாகவும் குறிப்பிடுகிறார்.

மேற்கு திக்கில்..பல அண்டங்களுக்கும் அரசனாகிய அரங்கன் தனது திருமுடியை வைத்துக்கொண்டு (இங்கு கிரீடம் , தலையை என்றப்பொருளில் வருகிறது) , கிழக்கு திசை நோக்கி...திருவரங்கம் கோயிலின் பல சுற்றுகள் , வீதிகள்..காவிரி தாண்டி , இவர் வாழும் திருமண்டகக்குடி வரையிலும் தனது பாதங்களை நீட்டி அருள் பாலிப்பதாகவும் ,

வட திசையில் உள்ளவர்கள் அதிகம் சமஸ்கிருதத்தில் புலமைப்பெற்றவர்கள்.
தெற்கில்
ஆழ்வார்களால், எம்பெருமானின் புகழ் பரவி விட்டது. ஆனால்..வட திசையில் தானே தனது பின்னழகைக்காண்பித்து ஈர்த்தாலே ஒழிய..அவர்கள் அரங்கன் பால் திரும்பப்போவதில்லை..ஆகவே தனது பின்னழகை(தோள் அழகை)க்காண்பித்தும்..

தென்திசையில் இலங்கை நோக்கி...
இங்கு ..

தர்மவர்மா என்ற பண்டைய சோழ அரசன்.. பிராத்திக்க.. அயோத்தியில் ஸ்ரீ ராமனால் பூஜிக்கப்பட்ட ரெங்க நாதர்..அழகான காவிரி பாயும் திருவரஙக்த்தில் தங்கிட ஆசைப்படுகிறார்.

அதற்காக செல்ல மறுக்க.. தர்ம வர்மா விபீஷணன் இடம் வேண்ட , விபீஷணன் தானும்...திருவரங்கத்தில் அரங்கனுடனே தங்கிட ஆசைப்பட..அப்போது.. அவர் இலங்கை சென்று அரசை ஆள வேண்டியதைக்கூறி நம் பெருமாள் அனுப்பி வைக்கிறார்.

அனுப்பி வைத்தாலும்..அவரை தாய் தன் குழந்தையை தூங்கும் போதும் கவனித்துக்கொள்வதுப்போல..கவனித்தப்படி இருக்கிறார் என்பதை..தென்திசை இலங்கை நோக்கி என்கிறார் ஆழ்வார்.

கடல் நிறக்கடவுள் , கடவுள் இந்த வார்த்தையை அபூர்வமாக ஆழ்வார் பிரயோகிக்கிறார்.

கடலைப்போன்ற கரு நீல நிறத்தில் உள்ளவன்.. பாற்கடலுக்குள் கிடப்பவன்...அனைத்தையும் கடந்து இருப்பவன் என்றப்பொருளில்...கடவுள் என்கிறார்.

கருநீல நிறமுடைய எந்தன் கடவுள்.. அரவமாகிய
. ஆதி சேஷன் மேல்..துயில்வதுப்போல யோக நித்திரையில் ஆழ்ந்திருக்கும் அழகைக்காண முடியாமல்..என் உடலும் ( ஏற்கனவே உள்ளம் உருகியாயிற்று) உருகுகின்றதே !

இங்கு.. ஆலோ என்பது ஐயோ என்றும் , உருகுமாலோ எனும் போது...உருகாமல் இருக்க என்ன வழி சொல்லுங்கள்..!

நீங்கள் தானே அரங்கனைக்கண்டும் உருகாமல்..பார்த்து செல்கிறீர்கள் என்றுக்கேட்பதாக பாசுரம் அமைந்துள்ளது !

பொருட் செறிவுடன் கூடிய 19 வதுப்பாசுரத்தை தொடர்ந்து..அடுத்தது ஆழ்வாரின் பாதம் பணிந்துக்காண்போம் !!

#திருமாலை

பெருங்கடல் காவிரியின் மீது பள்ளிக்கொண்ட அரங்கனின் வைபவம் சொல்லும் திருமாலை பாசுரம்

தமிழ் இலக்கியங்களில் தனி சிறப்பிடம்
பக்தி இலக்கியங்களுக்கு உண்டு.
பக்தியையும் வாழ்வியலையும் பிணைத்து வைத்தனர் இலக்கியங்களாக நம் முன்னோர்கள்.

தமிழ் பக்தி இலக்கியங்களில் வைணவத்தைப்போற்றி , திருமால் மஹாவிஷ்ணுவைப்பற்றி பாசுரங்களை இயற்றிவர்கள் ஆழ்வார்கள் என அழைக்கப்படுகின்றனர்.

இவர்கள் பன்னிருவர். இவர்கள் பாடிய தொகுப்பு நாலாயிரம் , நாலாயிரத் திவ்யப்பிரபந்தம் எனப்படுகின்றன.

இதில் அன்றைய சோழமண்டலம் , திருமண்டகக்குடியை பூர்வீகமாகக்கொண்டு , திருமால் பக்தியுடன் வாழ் நாள் தொண்டாக பூத்தொடுத்து இறைவனுக்கு சமர்ப்பிக்கும் அருந்தொண்டுப்புரிந்துவந்தவர் தொண்டரடிப்பொடியாழ்வார், இவர் இயற்பெயர் விப்ர நாராயணர்.

இவர் இயற்றியவை திருமாலை , திருப்பள்ளியெழுச்சி. திருவரங்கம் , ஸ்ரீரங்கம் கோவிலில் உறையும் பெரிய பெருமாள் அரங்கனை மட்டுமே இவர் பாடியவர் என்ற தகவலுடன், "திருமாலை" யில் அடுத்த பாசுரமாகிய 18 வது பாசுரத்தைக் காண்போமா !!

பாசுரம் :

இனிதிரைத்திவலை மோத எறியும்தண் பரவைமீதே
தனிகிடந்தரசு செய்யும் தாமரைக் கன்ணனென்ம்மான்
கனியிருந்தனைய செவ்வாய்க் கண்ணனைக் கண்ட கண்கள்
பனியரும் புதிரு மாலோ எஞ்செய்கேன் பாவியனே !

இனி அர்த்தமும்..விளக்கமும்..காண்போம் :

இனி - இனிதான
திரை  - அலை
திவலை - அலையின் துளி
மோத - இனிதாக அடித்து மோத
எறியும் - கொந்தளிக்கின்றன
தண் - குளிர்ந்த
பரவை மீதே - கடலைப்போன்று விரிந்தக் காவிரியின் மீது

தனிக்கிடந்தரசு செய்யும் - தனியாகக்கிடந்தருளி

அரசு செய்யும் - செங்கோல் செலுத்தும்..அரசாட்சி செய்யும்..அரக்கர்களை அழித்து மக்களைக்காத்து அரசு புரியும்

தாமரைக்கண்ணன் - தாமரை ப்போன்ற அழகியக் கண்களைக்கொண்ட கண்ணன்..அரங்கன்

எம்மான் - எமக்கு தலைவன்

கனி இருந்தனைய செவ்வாய் கண்ணனை - கொவ்வைக்கனிப்போன்ற சிவந்த வாயினையுடைய கண்ணன்
கண்ட கண்கள் - தரிசித்தக் கண்கள் (என் கண்களிலேயே நிற்கிறான்)

பனி அரும்பு - குளிர்ந்தக் கண்ணீர் துளிகள்
உதிருமாலே  - கண்களிலிருந்து பெருகுகின்றதே

பாவியேன் - பாவியாகிய (கண்ணாரக்கண்டுக்களிக்க முடியாத) நான்

என் செய்தேன் - என்ன பாபம் செய்தேனோ !

பாசுர விளக்கம் :

அலைகள் உண்டாக்கும் நீர்த்திவலைகள் அரங்கனது திருமேனியை  இனிதாக வந்து அடித்து மோத,
கொந்தளித்தும் குளிர்ந்தும் கடலைப்போன்ற அகன்ற காவிரியின் மேல் தனியாகக்கிடந்து கண் மூடியபடியே , பகைவர்களிடமிருந்து பக்தர்களை காத்து அருளும் , அரசாட்சி செய்யும் தாமைரையைப்போன்ற அழகியக்கண்களைக் காட்டி எம்மை அவன் பால் அன்பு பெருகவைத்த எம் தலைவன் அரங்கனை பெரிய பெருமாளைக் கண்டக் கண்களில் ,
பனித்த்துளிகள் போல கண்ணீர்  பெருகிறதே..அரங்கனை முழுவதும் தரிசித்து அனுபவம் பெறமுடியாத பாவியாகிப்போனேனே நான் என்ன செய்வேன் !

இங்கு .. பரந்த பாற்கடலைப்போல..காவிரியும் பரந்து விரிந்துள்ளதாம். அது கொந்தளித்தும் குளிர்ந்தும் இருக்கிறது.

வைகுண்டத்தில் பள்ளிக்கொண்டுள்ளதைப்போலவே நாராயணன் திருவரங்கத்திலும் பள்ளிக்கொண்டுள்ளான்..
அப்போது காவிரி அலையின் துளிகள்..இனிதாக அவரது திருமேனியின் மீது மோதுகின்றன.

திருவரங்கத்தில் அரங்கன்
தனியாக அருகில் தாயார் இல்லாமல் கிடந்தப்படியே கண் மூடி உள்ளார்.
 இவர் பகைவர்கள் , அசுரர்களை அழித்து  , பக்தர்களைக் காத்து ஆட்சிபுரிகிறார்.

தாமரையை போலுள்ளது அவர் கண்கள்..அந்தக்கண்களில் மயங்கியே  அவர் மேல் அன்பை வெள்ளமாக பெருக வைத்தார்.

அந்தக் கண்களை தரிசிக்கும்போது..பனித்துளிகள் போலே என் கண்ணீர் துளிகள் வந்து திரையிட்டு தடுக்கின்றனவே...

அவர் திருமேனியின் அழகை தரிசிக்க முடியாதப் பாவியாகிப்போகிறேனே என்ன செய்வேன் என தொண்டரடிப்பொடியாழ்வார் புலம்பும் பாசுரம் இது !

பெருமாளைக்காணும்போது மனம் பக்தியில் சுழன்று..அவனது திருமேனி தரிசனம் கண்டவுடன்..கண்கள் கண்ணீர் சொறிகின்றன. அதனால் அவரால் தரிசிக்க முடியவில்லை. ஆகையால்..

அடியேன் என்ன பாபம் செய்தேனோ என்று புலம்பி அரற்றி ஆழ்வார் பாடியுள்ள பாசுரம்..காவிரியின்  சிறப்பையும் ..

அரங்கனின் மேலுள்ள தீராக்காதலையும் உணர வைக்கும் பாசுரம் இது.

இனி அடுத்தப்பாசுரம் ஆழ்வாரின் பாதம் பணிந்துக் காண்போம்.

உங்களுடன் சில நொடிகள் !

என் நட்பிலேயே சிலர் , திருமாலை..நான் எழுதுவது தெரியாமலும் , யார் இயற்றியது எனவும் தெரியாமல் இருப்பதுபோல இருக்கிறது.  

திருமாலைக்காண்போமா என்ற தலைப்பைப்பார்த்ததுமே ஒரு லைக் போட்டும் போடாமலும் நகர்ந்துவிடுவர் என புரிந்தது. அவர்களுக்காகவும் , (பேஸ்புக்கில் ) 

ஒரு சிறிய அறிமுகத்துடன் அடுத்தப் பாசுரம் எழுதலாம் என எண்ணினேன்.

அதென்ன திருமாலைக் காண்போமா! ,  

இதானே !

அந்த காலத்தில் நம் பண்பாட்டையும் , அப்போதைய நிகழ்வுகளை யும் கோவில்களில் சிற்பமாக செதுக்கி வைத்தனர். பக்தியை சார்ந்த இலக்கியங்களும் எழுதப்பட்டன.

சிவனை வணங்குபவர்கள் எழுதியவை சைவக் கோட்பாடுகளை வெளிப்படுத்தியும் , திருமால் , மஹா விஷ்ணுவை வழிபட்டவர்கள் வைணவ இலக்கியங்களையும் தமிழில் தந்தனர்.

இதில் , நான் சமீபத்தில் ஒரு ஸ்கைப் வகுப்பின் மூலமாக நாலாயிர திவ்யப் பிரபந்தங்கள் கற்க ஆசைப்பட்டேன். அதற்காக என்னையும் அவர்களுடன் இணைத்துக்கொண்டேன். அதில் அப்போது , அவர்கள் எடுத்துக்கொண்டது , திருமாலை.

அதற்கான பாசுரங்களை மட்டும் சொல்லி வந்த நான் அதன் அர்த்தமும் தெரிந்துக்கொண்டால் பலாச்சுளையை தேனில் அமிழ்த்தி உண்ணும் சுவைக் கிடைக்குமே எண்றெண்ணினேன். அப்படியே அதற்கான தேடலில் இறங்கி..அதை இங்கும் பகிர ஆரம்பித்தேன்.

அடுத்தடுத்து எழுத முடியாமல் சிறிது இடைவெளி விட்டே எழுதி வந்தேன்.
சரி இப்போ என்ன வந்தது அதற்கு..அதானே..இதோ வந்து விட்டேன் !
திருமாலையைப்பற்றி சில வரிகள்.

தமிழ் இலக்கியங்களில் , வைணவத்திற்கென தனி இடம் பெற்றவை நாலாயிர திவ்வியப் பிரபந்தங்கள்.

அந்தந்தக்காலக்கட்டங்களில் வந்தவர்கள் மிகவும் பக்திப்பெருக்கோடு பல திருக்கோயில்களில் உறையும் மஹாவிஷ்ணுவைப்பற்றி , புகழ்ந்தும் , தனது நிலையையும் , பக்தியின் அவசியத்தையும் வலியுறுத்தி பாடல்களை இயற்றியுள்ளனர்.

பிற்காலத்தில் நாத முனிகள் என்பவரது பெரும் முயற்சியினால் இந்த நாலாயிரம் பாடல்கள் மீட்கப்பட்டன.

இதனை எழுதியவர்கள் ஆழ்வார்கள் என பிற்காலத்தில் அடையாளம் காணப்பட்டு அழைக்கப்பட்டனர்.

முதலாழ்வர்கள் நடுவில் வந்தவர்கள் , பிற்பாடு தோன்றியவர்கள் என வகைப்படுத்தப்பட்டனர்.

இதில் , திருமாலை என்பது நாலாயிர திவ்வியப் பிரபந்தங்கங்களில் ஒரு பகுதி.

யார் இதை இயற்றியது..ஏன் . எந்தக்காலத்தில் இயற்றினார் ? இதன் பொருள் என்ன இதுதான் என் மனதிலும் தோன்றின.

இதோ அதுவும். 

திருமாலை என்ற 45 பாடல்கள் இயற்றியவர் தொண்டரடிப்பொடியாழ்வார் என மற்றவர்களால் அழைக்கப்பட்ட விப்ர நாராயணன் என்ற சொந்தப்பெயர் கொண்டவர் . இவர் வாழ்க்கைக்குறிப்புகள் தந்திருக்கேன் . நினைவிருக்கலாம் , திருமால் பெருமை என்கிற திரைப்படத்திலும் பார்த்த நியாபகம் இருக்கலாம் . 

கும்பகோணத்தை அடுத்த திருமண்டகக்குடியில் பிறந்து , இயல்பிலேயே மஹாவிஷ்ணுவின் மீது பக்திக்கொண்டு அவருக்காக தினமும் பூப்பறித்து அதனை மாலையாக்கி அவருக்கு செலுத்தி வழிப்பட்டு வந்தவர் ,

அவரது வழியில் ஒரு தாசி(நடனமணி) குறுக்கிட , அவளை இவர் ஏறிட்டும் பார்க்காமல் இருக்க , அவளும் , இவரை பார்க்கவைக்க , இவரிடம் பழகி , தன் மேல் பைத்தியமாக்கிட முயற்சித்து வெற்றிப்பெறுகிறாள்.

விளைவு, பக்தியை விட்டு விப்ர நாராயணன் , அவள் மேல் மோகம் கொண்டு , அவள் நினைவாக அவளுடனே காமத்துடன் வாழ்கிறார்.

அரங்கனின் பொன் வட்டில்(பூஜைக்கு உபயோகிக்கும் பொருள்) காணாமல் போக , அதை இவர் தான் திருடியதாக சோழ மன்னரிடம் புகார் போக ,

இவர் அதை செய்ததாக இவரது சிஷ்யன் சாட்சி கூற , செய்யாதக்குற்றம் சாட்டப்பட்டு விடுதலை ஆகிறார்.

அரங்கன் தான் செய்த திருவிளையாடல் இது  என்று மன்னரது கனவில் வந்து உணர்த்தி , ஆழ்வாரை விடுவிக்க சொல்கிறார்.

பிறகு ஆழ்வார் தனது பக்தியை வெளிப்படுத்தி பாடல்கள் எழுதுகிறார் .

அதுவே இந்த திருமாலை .

இதில் முதல் (பாசுரங்கள் )14  பாடல்கள் , திருமாலின் பெயரை சொல்வதால் கிடைக்கும் பலன் , ஏன் சொல்ல வேண்டும் , ஏன் வேண்டும் பக்தி என்பவர் , அரங்கனிடம் , ஸ்ரீரங்கத்தில் உள்ள பெருமாளிடம் தமக்கு எப்படி பக்தி ஏற்பட்டது , அவர் தமக்கு எப்படி இறங்கினார் என்பதை , 

தன்னை விதியில்லா என்னைப்போல , மிகத் தாழ்ந்தவன் என்றுக் குறிப்பிட்டு , மற்ற எந்தத் தெய்வத்தையும் ஏறிடாமல் , பாடாமல் ஒரு பதி விரதைப்போல,  

அரங்கனைப் பாடிய வாயால் குரங்கனை(குரங்குகள் வாழும் மலையில் உள்ள திருவேங்கடமுடையான்) பாட மாட்டேன் என திருப்பதி பெருமாளையும் பாடாமல் , அச்சுவை பெரினும் வேண்டேன் என்று மோட்சத்தை யே வேண்டாம் என்கிறார் .

மற்ற ஆழ்வார்கள் பரமபத வாசம் கேட்கும் போது தனித்துப் பாடியவர் தொண்டரடிப்பொடியாழ்வார் , ஆம் இவர்  தொண்டருக்கும் தொண்டராக , அவரதுப்பாததுளிகளை கண்களில் ஒற்றிக்கொண்டு , அவர்களுக்கும் சேவை புரிந்தவர் .. !!

இனி அடுத்தடுத்தப் பாசுரம் படிக்கலாமா !!

திருமாலை அறிய வைக்கும் திருமாலை - 15

பக்தி இலக்கியங்களில் அவசியம் படித்து தெரிந்துக்கொள்ள வேண்டியது நாலாயிரத் திவ்யப்பிரபந்தத்தில்(தொகுப்புப்பாடல்கள்)  உள்ள "திருமாலை"

பாடியவர் தொண்டரடிப்பொடியாழ்வார் எனும் விப்ர நாராயணர் , இவர் வைணவம் பாடிய ஆழ்வார்களில் எட்டாவது .

(ஆழ்வார்கள்- வைணவத்தில் திருமால் ஸ்ரீமஹாவிஷ்ணுவைப்பாடியவர்கள், இவர்கள் பன்னிருவர்).

இவரது 45 பாசுரங்கள் திருமாலை என்று அழைக்கப்பட அவரும் அரங்கனை மட்டுமே பாடுவேன் என்று ஸ்ரீரங்கத்தில் பள்ளிக்கொண்டுள்ள ரெங்க நாதரை தமிழெனும் நெய் ஊற்றி தன் பக்தியையே திரியாக்கி , தீபமாக நமக்கு திருமாலை , திருப்பள்ளியெழுச்சி என்ற பாசுரங்களை தந்துள்ளார். இனி பாசுரம் காண்போமா.

திருமாலை - 15.

மெய்யர்க்கேமெய்யனாகும் விதியிலாவென்னைப்போல
பொய்யர்க்கே பொய்யனாகும்புட்கொடியுடையகோமான்
உய்யப்போர்முணர்வினார்கட்கு ஒருவனென்றுணர்ந்தபின்னை
ஐயப்பாடறுத்துத்தோன்றும் அழகனூரரங்கமன்றே

புட்கொடியுடையகோமான் - கருடனைக்கொடியில் கொண்ட அரசன் (திருமால்)
மெய்யற்கேமெய்யனாகும் - மெய் உடன் வெறுப்பில்லாமல் நினைப்பவர்க்கு , உண்மையானவனாக தன்னைக்காட்டிக்கொடுப்பவன்

விதியிலா என்னைப்ப்போல - பாக்கியமில்லாத தாழ்ந்தவனான என்னைப்போல

பொய்யர்க்கே பொய்யனாகும் - ஏற்க மறுக்கும் நாத்திகர்கள் பொய்யர்கள்
பொய்யனாகும் - தன்னை வெளிப்படுத்திக்கொள்ளாமல் பொய்யனாக இருக்கிறார் திருமால்.

உய்யப்போம் - உயர் நிலையை அடையவேண்டும்

உணர்வினாற்கட்கு - என்று உணர்வு உள்ளவர்களுக்கு
ஒருவன் என்று உணர்ந்த -
உடலைக்காட்டிலும் உயர்ந்தவர் ஆத்மா , ஆத்மாவைக்காட்டிலும் உயர்ந்தவர் ஒருவர் பரமாத்மா அவரே என்று உணர்ந்தப்பின்

ஐயப்பாடு அறுத்து - நம் அத்தனை சந்தேகங்களை யும் வேறுடன் அறுத்துக் காப்பாற்றிட

தோன்றும் - தோன்றியுள்ள

அழகனூரரங்கனன்றோ - அரங்கன் குடிக்கொண்டுள்ள ஊர் திருவரங்கம் அன்றோ !!

பாசுர விளக்கம் :

முழுமையாக உணர்ந்து வெறுப்பில்லாமல் தன்னை நினைப்பவர்களுக்கு , தன்னை மறைக்காமல் காட்டித்தந்து , அருள்பவன் கருடனைக்கொடியில் கொண்ட அரசனாகிய அரங்கன்.

பல தவறுகளை இழைத்த , பாக்கியமில்லாத என்னைப்போன்றவர்களுக்கும்

வெறுத்து , தெய்வமே இல்லை என்பவருக்கும் தன்னை முழுவதுமாக உணர்த்தாமல் பொய்யனாகவே இருக்கிறான்.

உயர்ந்த,மறுபிறப்பில்லாத முக்தி  நிலையை அடையவேண்டும் என்று உணர்ந்தவர்களுக்கும் , நம்மைவிட உயர்ந்தவன் ஒருவர் அவரே பரமாத்மா என்ற அறிவுடனும் அவரை எண்ணினால்
நமது அனாதிக்காலங்களாக ஏற்பட்ட சந்தேகங்கள் , பாபங்களை அழித்து தன் தரிசனத்தைக்காட்டித்தரும் அழகன் வாழும் ஊர் திருவரங்கம் அல்லவா !!

இங்கு ஆழ்வார் , மெய்யான பக்தி செலுத்தினால் , கருடன் , அனுமன் மற்ற வைகுண்டத்தில் நித்ய வாசம் செயபவர்களுக்கு எங்கனம் தன்னை வெளிப்படுத்தி தரிசனத்தைக் காட்டுவாரோ அங்கனமே தன்னை நம்மிடம் வெளிப்படுத்திக்கொள்கிறார்.

பொய்யாக (நாத்திகராக) இருப்பவர்களையும் வெறுத்து ஒதுக்குவதில்லை..தன்னை மறைத்துக்கொள்கிறார்.

முழுமையாக அவரே உற்ற தெய்வம் என்றுணர்ந்து , பிறவியை வெறுத்து , முக்தி வேண்டுவோர்க்கு அவரது அனாதிக்கால சந்தேகங்கள் , பாபங்களை வேரோடு அறுத்து தரிசனம் தரும் அழகன் வாழும் ஊர் திருவரங்கம். என்று திருவரங்கத்தின் பெருமையை திருமால் வாழும் ஊராக விளக்குகிறார் தன்னை தாழ்த்திக்கொண்டு..
என்னே ஆழ்வாரின் பக்தி !!
நம்பொருட்டு நமக்காக பரிவுடனும் , தமக்கு அரங்கன்  அருள்புரிந்ததையும் வெளிப்படுத்தியுள்ளப் பாசுரம் இது.
ஆழ்வாரின் பாதம் பணிந்து அடுத்தப்பாசுரம் காண்போம்..

#திருமாலை

திருமால் பெருமை - திருவரங்கம் அருமை !!

திருமாலைக் காண்போமா .

தமிழ் பக்தி இலக்கியங்களில் வைணவ இலக்கியங்கள் தனிச்சிறப்பு வாய்ந்தவை. இப்பாசுரங்களை எழுதியவர்கள் ஆழ்வார்கள் என்றழைக்கப்பட்டனர். பன்னிருவரில்.. சோழ நாட்டில் பிறந்தவர் ,  அரங்கனை தவிர பிற தெய்வத்தை பாட மாட்டேன் என்று பக்தி பயிர் செய்த தொண்டரடிப்பொடியாழ்வார் எழுதியது திருமாலை - திருப்பள்ளியெழுச்சி.

திருமாலை அறியாதார் "திருமாலை" யையே அறியாதார் என்ற வாக்கிற்கு இணங்க..அந்த திருமாலை அறிய முற்படும் முயற்சியில்..

இதோ அடுத்தப்பாசுரம்.

பாசுரம் - 14.

வண்டினம் முரலும் சோலை
மயிலினம் ஆலும் சோலை
கொண்டல் மீதனவும் சோலை
குயிலினம் கூவும் சோலை
அண்டர்கோன் அமரும் சோலை
அணி திருவரங்கமென்னா
மிண்டர்பாய்ந்து உண்ணும் சோற்றைவிலக்கி
நாய்க்கிடுமினீரே...

வண்டினம் முரலும் சோலை - வண்டுகள் ரீங்காரமிடும் சோலை

மயிலினம் ஆலும் சோலை - மயில் இனங்கள் ஆடிடும் சோலை

கொண்டல் மீதனவும் சோலை - மேகங்கள் கவிழ்ந்து  நிற்கும் சோலை

குயிலினம் கூவும் சோலை - குயில்கள் கூவிடும் சோலை

அண்டர்கோன் அமரும் சோலை - அண்டங்களுக்கும் , வைகுண்டம் வாழ் நித்திய சூரிகளுக்கும் தலைவன் அமர்ந்திடும் சோலை

அணி திருவரங்கமென்னா - ஆபரணமாக விளங்கிடும் திருவரங்கம் என்னும் பெயரை

மிண்டர் - அறிவிலிகள் / செய் நன்றி கொன்றார்கள்

பாய்ந்து உண்ணும் - பாய்ந்து , விரும்பி உண்ணும்

சோற்றை விலக்கி - சோறும் உண்பதும் மட்டுமே வாழ்க்கையென்று உண்பவர்கள் சோற்றை தவிர்த்து

நாய்க்கிடுமினீரே - நீங்கள் நாய்க்கு போடுங்கள்.

இனி பாசுர விளக்கம் :

வண்டினங்கள் ஏகப்பட்ட தேனை உண்ட மயக்கத்தால் ரீங்காரமிட்டும் , மயில்கள் நர்த்தனமாடியபடியும் , மேகக்கூட்டங்கள் சூழ்ந்து கவிழ்ந்தும்  நின்றிட , குயிலினங்கள் கூவியப்படி உள்ளதுமான சோலை , பல அண்டங்களுக்கும் (உலகங்களுக்கும்) வைகுண்ட வாசம் புரிபவர்களுக்கும் அரசனான திருமால் விரும்பி அமர்ந்திட்ட சோலை , ஆபரணமாக விளங்கும் திருவரங்கம் என்று  சொல்லாத அறிவிலிகள்(நன்றி மறந்தவர்கள்) , பாய்ந்து   சோற்றை மட்டும் உண்பவர்களை தவிர்த்து , நீங்கள் நாய்க்கு சோற்றை இடுங்கள் .

--------**---------

முந்தைய பாசுரங்களில் , மஹாவிஷ்ணுவின் பெயர்களை சொல்வதன் பலன்கள் , திருவரங்கத்தின் பெருமை , மகிமை , திருவரங்கம் என்று சொல்வதால் கிடைக்கும் நன்மை என மற்றவர்களுக்கு உபதேசமாக சொல்லி வந்த ஆழ்வார் , இந்தப்பாசுரத்துடன் அதனை முடித்துக்கொள்கிறார்.

நாவில் வறட்சி ஏற்படும் போது , பச்சை கற்பூரத்தை வாயிலிட்டு அதை சரி செய்துக் கொள்வது போல , பக்தி சிந்தனையற்றவர்களை அரங்கனின் பெருமையை சொல்லி , அவன் பால் அவரது சிந்தனைகளை திருப்பிட முயன்றவர் சற்றே தன்னை புதுப்பித்து க்கொள்ள திருவரங்கத்தில் உள்ள சோலைகளின் அழகை தெரிவிக்கிறார்.

ஸ்ரீரங்கம் சுற்றியுள்ள சோலைகளில் , மரங்கள் , பூக்களில் மிதமிந்திய மது-தேனை அருந்திய வண்டுகள் அதில் மதிமயங்கி எழுப்பும் ஒரு வித ரீங்காரம் (முரலும் என்கிறார்.) செய்தபடியே கூட்டமாக கிளம்ப , அதை கருமேகம் என எண்ணிய மயிலனங்கள் தோகை விரித்து ஆட ஆரம்பிக்க , மயிலின் அழகையும் , தான் வரும் முன் ஏன் ஆடுகிறது என தெரிந்துக்கொள்ளவும் மேகங்கள் வந்து தலை கவிழந்திட , குயிலினங்கள் தாங்கள் அமர்ந்த கதகதப்பான இடத்தில் இருந்தப்படியே இந்த அழகை ரசித்தப்படி கூவிட அழகான சோலை.

இந்த சோலையில் , வீபிடணுடன் இலங்கை செல்லாமல் , நம் பொருட்டு ராமரால் தரப்பட்ட தங்க விமானத்துடன் கூடிய பெரியபெருமாள் - அரங்கன் , பல அண்டங்களிலும் வசிக்கும் அனைவருக்கும் அரசன் (தலைவன்-திருமால்) நமக்காக திருவரங்கம் வந்து தங்கிட்ட சோலை . அப்படிப்பட்ட திருவரங்கம் , சம்சாரம் எனும் பிணி போக்கிடும் அணி , ஆபரணம் இந்த திருவரங்கம் (அரங்கன்)
என்ற எண்ணம் இல்லாமல் , நன்றி மறந்து , அரங்கனை நினைக்காமல் , சோறு மட்டுமே முக்கியம் என்றெண்ணி , வாழும் மனிதர்களுக்கு உணவிடுவதை விட ,

ஒரு வேளை உணவிட்டதற்காக வீட்டு வாசலில் பழியாகக் கிடக்கும் நாய்க்கு உணவிடுங்கள் என்கிறார் ஆழ்வார்.

இந்தப்பாசுரத்தில் ஆழ்வார் நம் பால் கொண்ட அன்பு , நம்மையும் அரங்கன் பால் பக்திக்கொள்ள செய்யும் பாங்கு , ஆதங்கம் , திருவரங்கம் பெருமை அழகை சிலாகித்தல் அனைத்தும் புலனாகிறது .

ஆழ்வாரின் பாதம் பணிந்து அடுத்தடுத்த பாசுரங்களுக்கு நகர்வோம்.

அறிவோம் திருமாலை !

திருமாலை -11.

ஸ்ரீமஹாவிஷ்ணுவின் வனமாலையின் அம்சமாக மார்கழி மாதம் கேட்டை நட்சத்திரத்தில் , அன்றைய சோழ நாட்டில் திருமண்டகக்குடியில் விப்ர நாராயணன் என்ற இயர்பெயருடன் அவதரித்தவர் திருமாலை , திருப்பள்ளியெழுச்சி என்ற இரு வைணவ  தமிழ் அமுதங்களை தந்தருளியவர்  தொண்டரடிப்பொடியாழ்வார் .
இவர் பாடியது அரங்கனை , நேசித்தது திருவரங்கத்தை !

பரமபதத்தில் பள்ளிக்கொண்டுள்ள வாசுதேவன் , மனிதராக அவதரித்த ராமர் , கண்ணனை சரணடையுங்கள் , இல்லறத்துன்பம் தீரும் என்றார் முந்தையப்பாசுரங்களில்.

பாற்கடல் நாதனை தரிசிப்பதோ , காலம் கடந்த ராமனையோ , த்வாபர யுகத்தில் வாழ்ந்த கண்ணனையோ தரிசித்து வழிபடுவது இயலாதக்காரியம் என்பதால்..பெரிய கோவில் என்றழைக்கப்பட்ட திருவரங்கம் வாழ் அரங்கனை வழிபடுங்கள் என்கிறார்.
அதே இப்பாசுரம்.

பாசுரம் -11.

ஒருவில்லோங்குமுன்னீடைத்து உலகங்களுய்ய
செருவிலேயரக்கர்கோனைச்செற்ற நம் சேவகனார்
மருவியபெரியகோயில் மதிள் திருவரங்கமென்னா
கருவிலே திருவிலாதீர் ! காலத்தைக்கழிக்கின்றீரே !

ஒருவில்லோங்கு - எதோ ஒரு வில்லால் ஓங்கி . 

முன்னீரடைத்து - சமுத்திரத்திற்கும் முன் கோபப்பட்டு , மூன்று நீர் கலக்கும் சமுத்திரத்தை வில்லால் ஓங்கி அடைத்து
உலகங்களுய்ய - ஈரேழு உலகங்களும் நிம்மதியாக உய்ய

செருவிலே அரக்கர்கோனை - நேர்மையான முறையில் வெற்றிக்கொண்ட அரக்கர்களின் தலைவனை (இராவணனை)

செற்ற - தோற்கடித்து  நமக்கு உபகாரம் செய்ய வந்த நம் இராமன்

மருவியபெரியகோயில் - (மறுதலித்து) செல்லாமல் தங்கிய அரங்கனாக எழுந்தருளியிருக்கும் பெரியகோயில்

மதிள்திருவரங்கமென்னா - மதிள் சூழ்ந்த பெரியகோவிலைக்கொண்ட திருவரங்கம் என்று எண்ணாமல் 

கருவிலே திருவிலாதீர் - கருவில் இருக்கையிலே பகவானை தரிசிக்காதவர்களே !

காலத்தைக்கழிக்கின்றீரே - வீணாக உண்டும் , உறங்கியும் காலத்தைக்கழிக்கின்றீரே !!

பாசுர விளக்கம் -

இராமாயணத்தில் , சமுத்திரம் தாண்டிச்செல்ல வானர சேனையுடன் ராம லஷ்மணர்கள் காத்திருக்க , விபீஷணன் சுக்ரீவன் மூலம் சமுத்திர ராஜனைப் பணிந்து வேண்டச்சொல்கிறார் இராமனை.

ராமனும் , மூன்று நாட்கள் பட்டினிக் கிடந்து , சமுத்திரக்கரையில் கடக்க வழி வேண்டி , சமுத்திர ராஜனை அழைத்துக்காத்துக்கிடக்க சமுத்திர ராஜன் வரவில்லை.

கோபத்தால் குணக்கடலான ஸ்ரீராமன் , வில்லேந்துகிறார் அதையே ஆழ்வார் இங்கு ஒரு வில்லால் ஓங்கி என்கிறார்.

ஒரு வில்லை  ஓங்கியதால் , மூன்று நீர்களைக்கொண்ட சமுத்திரம் பணிந்திட , அதனால் சமுத்திரத்தை  அடைத்த , கற்பாலம் கொண்டு அதன் மூலம் இலங்கை சென்று இராமன் ,  இராவணன் செய்த கொடுமைகளால் ஈரேழு உலகங்களும் வருந்தி இருக்க , இந்த உலகங்கள் உய்வதற்காக , நேர்மையான, போர்  முறையில் , அரக்கர்களின் தலைவனாக விளங்கிய இராவணனை வெற்றிக்கொண்டவன் , நம் பொருட்டு , நமக்காக உதவ அர்ச்சாவதார மூர்த்தியாக

மறுப்பெதும் தெரிவிக்காமல் தானாகவே தங்கிய , கோயில்  பெரியகோயில்.
அளவாலும் , கேட்டதை உடனே அளிப்பதாலும் பெரிய கோயில் என்றழைக்கப்பட்ட திருவரங்கத்தை எண்ணாதவர்களே !!

நீங்கள் கருவில் இருக்கும்போதே இறைவனை தரிசித்து இருக்க மாட்டீர்களோ !  (இருந்திருந்தால் திருவரங்கம் பற்றி எண்ணத்தோன்றும்)

வீணாக உண்டும் , உறங்கியும் திருவரங்கம் , அரங்கனை நினைக்கவேண்டும் என்ற எண்ணம் இல்லாமல் காலத்தை கழிக்கின்றீர்களே !!

இல்லறத்தில் சிக்குண்டு வாழ வழி தெரியாமல் பல அல்லல்கள் படும் நம் பொருட்டு ஆழ்வார் பல வழிகளை சொல்கிறார் திருமாலை எனும் 45 பாசுரங்களின் வழியே !

திருவரங்கம் என்ற சொல்லே , அரங்கன் என்ற நினைவே ,  பிறப்பறுக்கும் ! இதில் நேரடியாக இராமன் என்றோ , அரங்கன் என்றோ கூறாமல் , இப்பேர்ப்பட்ட சேவகனாக நமக்காக இரங்கிய ராமனே , அரங்கனாக அர்ச்சனைக்குரிய மூர்த்தியாக இங்கு வந்து எழுந்தருளியிருக்கும் போது ! அவரையும் , பெரியகோயிலையும் நினைக்காமல் வீணாக கழிக்க வேண்டாம் என்கிறார் தொண்டரடிப்பொடியாழ்வார்.

ஆழ்வாரின் பாதம் பணிந்து அடுத்த பாசுரம் காண்போம் ...(விரைவில் )