Saturday, 2 January 2016

சாயி நாதா ..

குருர் பிரம்மா குரூர் விஷ்ணு குரூர் தேவோ மஹேஷ்வர :
குரு சாக்‌ஷாத் பரப்ரும்மா தஸ்மை ஸ்ரீ குரவே நமஹ||

நமது மனித வாழ்வில் , மதங்களும் சமயங்களும் மனித வாழ்வை நன்னெறிப்படுத்தவும் , மேன்மேலும்
செம்மைப்படுத்தவும் ஏற்ப்படுத்தப்பட்டவை. 

சிறப்பான வழியில் சீர் தூக்கிய இறை சிந்தனைகளுடன் , தர்மத்தின் வழியில் , குருவின் அருளாசியுடன் மனித வாழ்வை முடித்திட , மானுடப்பிறப்பிற்கு முற்றுப்புள்ளி வைக்கப்பட்டு ,அனாதி கால பாவங்களும் , புண்ணியங்களும் சரிசமமாகிட , முடிவில்லா ஆனந்தமாக பிறவியற்ற பேறு நிலை எய்தப்படுவதாக நம் சனாதன தர்மத்தில் புராணங்களும், இறைவனின் அவதார மகிமைகளின்மூலமும் , பாரதப்புண்ணிய பூமியை தம் அவதாரங்களில் இன்னும் இன்னும் அழகாக்கிய மகான்களின் அறிவுரைகளாலும் அறிகிறோம்.

மாதா- பிதா- குரு-தெய்வம் தமிழ் மொழி அமுதத்தில் சொல்லித்தரப்பட்ட இனிய வாக்கியம் , இதில் மாதா பிதாவும் இணைந்து குருவைக்காட்டிட , அந்த குருவின் மூலமே , பரம்பொருளாகிய இறைவனை அடையலாம் என்பது தெள்ளத்தெளிவாக உணர வைக்கப்படுகிறது.

ஆச்சாரியர்கள் எனும் நமக்கு குருவாக அவதரித்தவர்கள்  நம் பாவங்களிருந்து , விடுவித்து , இறை நாமத்தின் மூலம் , நம்மிடையே பக்தியை விதைத்து , பலனாக மோட்சக்கனியை நமக்கு ஊட்டிட வந்தனர்.

அப்படியே, மகாராட்டிரா மாநிலத்தில் கோதாவரி ஆற்றின் கரையில் அமைந்த ஷீரடி என்ற புண்ணிய பூமியில் அனைவருக்கும் ஏழைப்பங்காளானாகக் காட்சித்தந்து அருளியவர் , இறைனுபவத்தை அனைவருக்கும் அள்ளி வழங்கிடும் சாய் மகான் , பாபா என அனைவராலும் எவ்விடத்திலிருந்து அழைத்தாலும் அருளிக்காக்கிறேன் எனும் சாயி பாபா.

நமது இந்து சம்பிரதாயங்களில் மற்றவர்கள் துயர்க்கண்டு பொறுக்காமல் இயன்ற அளவில்  உதவுதலும் , பக்தர்களுக்கும் அடியவர்களாகி தொண்டு புரிதலும் முக்கியமானதாக சொல்லப்படுகிறது.

அடியார்க்கு அடியார் , எளிமைக்கும் இறங்கிடும் இறைவனால் ஏற்கப்படுகிறார்.
பாபா என்பவர் யார் .. ஏன் இத்தனை மக்கள் கொண்டாடுகிறார்?
புரியாத மொழியில் அவர் மேல் பாடல்களா ? , பஜன் என்கிறார்களே! 

இப்படி சிறுப்பிள்ளைத்தனமான பல கேள்விகள் எழுந்ததும் இறைவனின் ஆணையாகவே , அந்த அனுபவங்களும் நிகழ்ந்தன எங்கள் வாழ்விலும்.
2006 ம் ஆண்டு, முதன்முதலாக, வெள்ளை உள்ளத்துடன், உருவத்துடன், என்னைப்பற்றி நானே சொல்கிறேனே என்றப்படியே சாயிபாபா உள் நுழைந்தார் எங்களுக்குள்.


பிறந்தக்குழந்தை,தீவிர சிகிச்சைப்பிரிவில் , பிழைக்குமா இல்லையா என்றறியாத நிலையில், இன்றும் என்றும் திருமால் ஒருவனே பர தெய்வம் என்றுரைக்கும்  , தீவிர வைணவனது கைகளுக்குள் சாய் சரித்ரா  ஆங்கில வடிவப்புத்தகமும் , சிரித்தவாறே கால் மேல் கால் போட்டமர்ந்த வெள்ளை பாபாவும் வந்தமர்ந்தார் ,  மராட்டியப்பெண் அலுவலகத்தோழி ஹர்ஷலா என்பவள் மூலம்.


ஒரு இரவு , பிரயாணத்தில் அத்தனைப்பக்கங்களும் துக்கம் படிந்த மனம் அழுந்திட படித்து முடித்து , கையில் சூட்கேஸில் பாபா உருவ சிலையுடன், சிகிச்சைப்பெற்று வந்த சிசுவைக்கண்டதும் ஏனோ தனித்தெம்பு அவர் மனதில் ஊறியது .
எப்படி , ஏனென்று உணர இயலாத சோகச்சுமை .. குழந்தைக்கு பூரண சுகமடைந்து , தொட்டிலிட்டு பேர் வைக்கும் தருணம் , சாய் வைதேகி என்று பெயரும் வைத்திடு . இது என் பிரார்த்தனை !

விரைவில் நாம் சீரடி செல்ல இருக்கிறோம் என்ற கணவரது சொல் கேட்டு முதன் முறையாக வியந்து அப்படியே ஏற்றுக்கொண்டாள் அவள்.ஆம் ...நான்!
அந்த ஆசீர்வதிக்கப்பட்ட குழந்தை , 1 மாத தீவிர சிகிச்சைப்பிரிவிலிருந்து வெளிவந்து இன்மொழி பேசி , நான் சாய் வைதேகி என்று சிரிக்கிறது , எப்போதும் உடனிருந்து பார்க்கிறேன் என்று சிரித்தப்படியே வீட்டிருக்கிறார் அந்த வெள்ளை மகான் .. சாயி மகான்..

இப்போதும் இதை நெகிழ்வுடன் பகிர்கிறேன் அடியேன் நான், எனது வாழ்வில்  நடந்த அந்த மஹானின் அற்புதம் இது !


எந்த ஒரு இறை அனுபவமும் , நாம் செய்த முற்பிறவி கர்மப்பலன்களின் விளைவால் நிகழ்பவை, உணர்பவர்களுக்கு அனைத்தையும் உணர்த்துபவனும் இறைவனே !

சொல்லித்தெரியவதில்லை இனிப்பின் சுவை , வீசும் தென்றலின் இதம் , சுமந்து வரும் காற்றில் மலர்களின் மணம்.  உணர்வால் தெரியும் தனியொரு இன்பம்.
இறையனுபவமும் அத்தகைய ஒரு பேரானுபவம் . அதை இறைவனின் ஒப்புதலுடன் அவனது திரு விளையாடல்கள் , அவனது அடியார்கள் அவனது அருளால் நிகழ்த்தும்போது உணரப்படுபவை. அப்படி மற்றுமோர் பேரானுபவம்.

ஷீரடி தலத்தை எவன் மிதிக்கிறானோ , அவனுடைய துன்பம் ஒரு முடிவை அடைந்து சௌகர்யத்தை அடைகிறான் ”.
என்ற பாபாவின் உபதேச மொழிக்கேற்ப ஒருவரது வாழ்வில் அடைந்த மேன்மையை அவர் வார்த்தைகளில் காண்போம் .
ஒவ்வொருவர் மனதிலும்  சாய்பாபா வீற்றிருக்க வேண்டுமென்றால் அவர் இன்னொருவர் மூலம் தான் உணர்த்துவார் என்று நான் கேள்விப்பட்டிருக்கிறேன் .

எங்களின் வாழ்விலும் சாயி பாபா அவ்வண்ணமே உள் நுழைந்தார்.
சுமார் ஆறு வருடங்களுக்கு முன் , நான் சென்னையில் , ஒரு பிரபல மருத்துவமனையில் உணவு ஆலோசகராக வேலை செய்து வந்தப்போது , மழலை பேறு வாய்க்காமல் , திருமணமாகி பலரது வாய் அவலாக என் வாழ்வு போய்க்கொண்டிருக்க , அதனை மறந்து , அந்த சிந்தனைகளும் மறத்துப்போக ஆரம்பித்திருந்தேன்.

திருமணமாகி , இரண்டரை வருடங்கள் ஆகியும் குழந்தை
இல்லாக்குறையை , குறையுடன் வரும் நோயாளிகளுடன் அவர் தம் பிரச்சனைகளுடன்  மணிக்கணிக்கில் பேசியப்படி ,அதில் என் கவலைகளை  மறந்திருப்பேன் .

அப்படியே , ஒரு நாள் , அந்த சிறப்பு பிரிவில் நுழைந்தேன் .
அங்கு ஒரு அறையில் ஏறக்குறைய உயிர்ப்போகும் தருவாயில் இருந்து தப்பித்த ஒரு இளம் மருத்துவ மாணவி சிகிச்சை பெற்று சுய நினைவின்றி இருந்தார் .

நான் அவரின் பெற்றோர்களுக்கு ஆறுதல் கூறி ,அவருக்குத்தர வேண்டிய உணவுப்பற்றிய சந்தேகங்களை யும் விளக்கிவிட்டுப் பார்த்தேன் . அவ்வறையில் ஷீரடி சாய்பாபாவின் படத்திற்கு புஷ்பாஞ்சலி செய்து விட்டு , சாய் சரித்திரம் புத்தகத்தையும் படித்துக்கொண்டிருந்தனர்.

அன்று வியாழக்கிழமை, அந்தப்பெண்ணின் பெற்றோர் உடனே என் பக்கம் திரும்பி , & நீயும் சாய் சரித்திரம் புத்தகத்தைப்படிம்மா ! உன் கவலைகளை யும் , பாபா தீர்த்து வைப்பார் & என்றுக்கூறி , ஆரத்திப்பாடல்கள் அடங்கிய புத்தகங்களை எனக்குக்கொடுத்தனர் .

அந்தப்பெண்ணின் தாய் , என்னை நன்குப்படித்தவர்ப்போல் தோன்றினார்.
அவரதுப்பார்வை என்னை ஊடுருவிட ,&  உன்னைப்பார்த்தால் , எதோ மனக்கவலையில் உள்ளது போல தெரிகிறது !! ஒரு முறை சாய் சரித்திரம் படித்துப்பாரும்மா !! உன் கவலைகளை கண்டிப்பாக தீர்த்து வைப்பார் & என்றார் . அவசியம் பாபாவிடம் நம்பிக்கை வையுங்கள் என்றும் அழுந்தக்கூறினார்.

அப்போது அவர்களிடம் சிரித்தப்படியே விடைப்பெற்றாலும் மனம் ஏனோ ஒன்றிட மறுத்தது , நம்பிக்கை உண்டா உனக்கு என பலமுறை கேள்விகளை எழுப்பிப்பார்த்தது.

புத்தகத்துடன் வீடு வந்து சேர்ந்த நான் , அதுவரையில் பாபாவில் பெரிதாக ஈடுபாடோ ,நம்பிக்கை யோ இல்லாத நான் , அப்படி என்னதான் இந்த புத்தகத்தில் , என்ற ஆர்வம் மேலிட சரிப் படித்துதான் பார்ப்போமே என்று பிரித்துப்படிக்க ஆரம்பித்தேன் !.

பாபா இருப்பது உண்மையெனில் , இந்த புத்தகத்தைப்படித்த சில நாட்களில் , நான் ஷீரடி செல்ல வேண்டும் என மனதிற்குள் எண்ணியப்படியே புத்தகத்தைப்படித்தேன் .

படித்து முடித்து ஒரு வாரம் ஆயிற்று ..கிட்டத்தட்ட மறந்தேப்போயிருந்த நிலையில் , ஒரு நாள் திடீரென என் கணவர் ஷீரடிக்கு விமான டிக்கெட்டுகள் புக் செய்திருப்பதாகவும் , என் பிறந்த நாளன்று , ஷீரடியில் தங்கப்போவதாகவும் சொல்லி என்னிடம் டிக்கெட்டுகளைத் தந்தார் !
எனக்கு ஒரு நிமிடம் என்ன சொல்வதென்றறியாமல் திகைத்துப்போய் ,தெரியாமல்   நின்றிருந்தேன் .

நான் நினைத்தது என் கணவருக்கு எப்படி தெரிந்தது என்று புரியாதப்புதிராக ஆச்சர்யப்பட்டுப்போனேன் !

இது சாயிபாபா எதோ எனக்கு உணர்த்துவதாகவே தோன்றியது.
பின் ஷீரடி சென்று மனதாரப்பிரார்த்தித்துக்கொண்டு வந்தேன். 
வாராவாரம் வியாழக்கிழமை விரதம் ஏற்றுக்கொண்டு , அதன்படியே இருந்தும் , பலப்பிரார்த்தனைகளை நானும் என் கணவரும்  மேற்கொண்டோம் !

இயற்கையான முறையிலும் , வழக்கமான மருத்துவ சிகிச்சை முறையிலும் குழந்தைப்பிறப்பிற்கான வாய்ப்புகள் குறைவென்று மருத்துவர்கள் கூறியப்பின்பும் , மனம் தளராமல் , சிகிச்சையை நம்பிக்கை யுடன் பின்பற்றினோம் .

எங்களது ஆத்மார்த்தப்
பிரார்த்தனையை சாயிபாபா ஏற்றுக்கொண்டார் . இடைவிடாத வேண்டுகோளுக்கு தலையசைத்தார்.

ஆம்.அதன் பலனாக சமீபத்தில் அழகியப்பெண் குழந்தையை நான் பெற்றெடுக்க , மழலைப்பேறு வாய்க்கப்பெற்று , பால் மணமும் கண்டேன் , பெற்றோர்கள் ஆனோம் .
சாய் ரெங்க நாயகி எனப்பெயரிட்டுள்ளோம்.
அன்றும் , இன்றும் சாயிபாபா அவர்களை நம்பிக்கையுடன் பிரார்த்தித்து வருகிறோம் !

நம்பிக்கையுடன் , பிரார்த்தனை செய்யும்போது , எங்களது குறைகளை , குருவாக , குடும்பத்தில் ஒருவராக இருந்து , சாயிபாபா தீர்த்து வைக்கிறார் என உறுதியாக நம்புகிறோம் !

இந்த அனுபவத்தைப்பகிர்ந்துக் கொண்டு சிலிர்க்கிறார் கோவை சேர்ந்த திருமதி. அனுஷா சதீஷ்குமார்.

"நீ என் உபதேசத்திற்காகவும், உதவிக்காவும் என்னை அடைந்தால் அவைகளை உடனே நான் உனக்கு கொடுப்பேன் !! "
இது ஷீரடி நாயகனின் , தம் அடியார்களுக்கு எளியோனாக உதிர்த்த உபதேச மொழிகளுள் ஒன்று ..

இப்படியே எங்களின் வாழ்விலும் சாயிமகான் நுழைந்து ஆட்கொண்டார் என்கிறார் துபாயைச் சேர்ந்த சுந்தரி அனந்த்.

திருமணத்திற்கு முன் பலர் கூறக்கேட்டிருந்தப்போதும் , அத்தனை ஈடுபாடு சாயி பகவானிடம் வந்து விட வில்லை.

திருமணமும் ஆகி , அயல் நாட்டு வாழ்வில் ஈடுபட ஆரம்பித்திருந்தோம் , உடன் வாழ்ந்த நண்பர்களின் சாயிபாபா வின் பக்தியைக்கண்டு வியந்து , பஜனைகளில் ஈடுபட்டிருந்தாலும் , எங்களின் மனம் லயிக்காமலே சுற்றி வந்திருந்தது , சுற்றமும், சொந்தமும் பாபாவே என்று ஆனது ஒரு சுவாரஸ்யமான சம்பவத்தினால் .

2003 ம் வருடம், என் மாமியார், மாமனார் அபுதாபியில் நாங்கள் குடியிருந்தப்போது எங்களைக்காண இந்தியாவிலிருந்து வருகைத் தந்திருந்தனர். பஜனை சம்பிரதாயங்களில் மிகுந்தப்பிடிப்புள்ளது என் புகுந்த வீடு.

அப்போது தான் அந்த அதிசய சம்பவம் நிகழ்ந்தது.
ஏர்ப்போர்ட் லிருந்து வீட்டிற்கு அழைத்து வந்தோம் மாமியார், மாமனாரை.
வந்து சற்று இளைப்பாறியதும் , தம் லக்கேஜ்களைப்பிரித்து எங்களுக்காக அவர்கள் வாங்கி வந்திருந்தப்பொருட்களை எங்களுக்குத் தர ஆரம்பித்தனர்.
அனைத்தையும் எடுத்தத்தந்தப்பின்..கொண்டு வந்திருந்தப்பெட்டியில் , இறுதியாக சாயி நாதனின் படம் இருந்தது. அவர் ஆசீர்வதிப்பதாகக்கண்டதும் ஆச்சர்யம் தாங்காமல்..இது எப்படி என்று அவர்களே வியந்துப்போயினர்.
தானாக வீடு தேடி வந்த சாயி பகவானின் அனுகிரஹம் அன்று முதல் என்னை ஆட்கொள்வதை உணர ஆரம்பித்தேன் .

அதுவரை ஏனோ தானோ என்றிருந்த எனக்கு ஆழ்ந்த நம்பிக்கையும் , அழுத்தமான பிடிப்பும் , சாய் பாபாவின் மேல் ஆரம்பிக்க , அந்தப்படத்தையேக்கொண்டு அவரைப்பூஜிக்க ஆரம்பித்தேன் .
வியாழக்கிழமை அவரை எண்ணி , அவருக்கான
அஷ்டோத்திர ங்கள் படித்து , பூஜை செய்வதும் , விரதமும் ஏற்றுக்கொண்டேன். 
படிப்படியாக குடும்பத்தில் ஏற்றமும் ஏற்பட ..ஷீரடி புண்ணியஸ்தலத்திற்கான பிரயாணமும் மேற்கொண்டோம் !
அற்புதமான சேவையுடன் , சாயிபகவானின் தரிசனமும் கிடைக்கப்பெற்றோம்.

என் மூலம் என் தாய் தந்தையருக்கும் சாயி பகவான் அருள்பாலிக்க ஆரம்பித்தார் , உற்ற துணையாக மாறினார்.

பல்வேறு உடல் உபாதைகளுடன் போராட ஆரம்பித்த என் அப்பா , படுக்கையில் வீழ்ந்த போது , துணையின்றி என் அம்மா தனியாக தவிக்க ஆரம்பித்தார் . மருத்துவ செலவுடன் , அப்பாவின் நோயும் தீவிரமடைய ஆரம்பித்திருந்தது .

தன்னந்தனியாக போராடி வந்த அம்மா , தெம்பினை இழக்க ஆரம்பிக்க , அப்பாவும் மருந்துகளுக்கு உடன்படாமல் , அவதிப்பட , போர்க்களமானது எங்கள் வாழ்வு. 
வியாழனன்று விரதத்தில் நான் இருந்திட , அம்மாவும் மிகுந்த வேதனையுடன் மாம்பலம் வாழ் சாயி நாதனிடம் சென்று அழுகையுடன் , ஏன் இப்படி என் கணவர் அவதிப்படுகிறார் , குணமாக்கி நடமாடிட வேண்டும் அல்லது துன்பமின்றி உன் பதம் சேர்ந்திட வேண்டும் ,
 அல்லல்களிருந்து காப்பாற்றிட மாட்டாயா சாயி நாதா என்று மனமுருகி பிரார்த்தித்திருக்கிறார்.
அதே வியாழனன்றே , கோவிலிருந்து வீடு திரும்பி , ஸ்பூனில் பிரசாதத்தை அப்பாக்கு தந்திட , அப்பாவின் உயிர் அமைதியாகப்பிரிந்து , இறைவனடி சேர்ந்திருக்கிறது.
இப்போதும் இரவிலும் பகலிலும் என் அம்மாக்கு துணையாக அருகிலேயே இருக்கிறார் சாயிபகவான் .

சாய்சாய்ராம் என்று எனக்கும் பதட்டமோ , இன்பமோ , எந்த சூழ் நிலையிலும் என் வாய் உச்சரிக்கும் மந்திரமாகிப்போனது..

பல்வேறு இன்பத்துன்பங்களிலும் , சாயி பாபா எங்களுடன் வழி நடத்தி செல்வதாகவும் உணர்கிறோம்.. !!
இந்தியா சென்றதும் முதலில் மயிலைவாழ் சாயிபகவானை தரிசிப்பதும், மாம்பலம் சாயிநாதனை தினமும் காலையில் தரிசிக்காமல் என் நாள் முடிவடைவதில்லை. என்னைப்போலவே என் அக்காவும், அவரது கணவரும் மிகுந்த பக்தியுடன் வியாழனன்று விரதம், பூஜையுடன் பிரார்த்தித்துவருகின்றனர்.

ஆத்மார்த்தமான பக்தியும் , நம்பிக்கையுமே நம்மை சாயி பகவானிடம் சேர்த்து வைக்கிறது என்று ஆழ்ந்த நம்பிக்கையுடன் பகிர்கிறார் திருமதி சுந்தரி. 

வயதானவர்கள் வாழ்வில் பலப்பல சோதனைகளைக்கடந்து வந்திருந்தாலும் , வயோதிகத்தில் சில உடல் பிரச்னைகள் மேன்மேலும் அவர்களது வாழ்வை சிரமத்திற்குள்ளாக்குகிறது .

அப்படி ஒரு கஷ்டத்திலிருந்து மீண்டு வந்ததையும் , சாயிபாபாவின் அருளினால் தாம் கடந்ததையும் பகிர்கிறார் திருச்சியிலிருந்து திருமதி.விமலா சந்தானகோபாலன்.

வயோதிகத்தில் நடப்பதே சவாலாகிட , கால் மூட்டுகளின் தேய்மானம் பெரும் மன உளைச்சலையும் , கால்வலியுடன் சேர்த்தேத்தந்தது எனக்கு.

வலது கால் மூட்டு தேய்மானம் அடைந்த நிலையில் ஆயுர்வேதம் , அலோபதி மருத்துவ முறையில் முயற்சி செய்தும் பலனில்லாமல் போனது .

என்னை நாலு அடி நடக்கவும் இயலாமல் முடக்கியது முடக்குவாதம் !

மிகவும் மனம் நொந்த நிலையில் , இனி அவ்வளவுதான் என்றிருந்த நிலையில் , என் மகளின் மூலம் , ஷீரடி சாயிபகவானின் படம் கிடைக்கப்பெற்று , தினமும் பூச்சாற்றி , பிரார்த்தித்து வந்தேன் .

பல டாக்டர்களும் , இப்படியே விட்டுவிட்டால் மல்டிப்பிள் ப்ராக்சர் ஆகலாம் என்றும் , உடனே மூட்டு மாற்று அறுவை சிகிச்சை செய்ய வேண்டியது அவசியம் என்றிட என்னுள் வேதனை விஸ்வரூபம் எடுத்ததது.
என்னை சந்தித்த சிலரும் , மிகுந்த சிரமமேற்கொண்டே சர்ஜரிமேற்கொள்ளவேண்டும், சர்ஜரி செய்துக்கொண்டவர்கள்
அனைவரும் நடப்பதில்லை என்றும்கூறிட, பயமும் நோயுடன் வளர்ந்தது.

சாயி பகவானே நீ விட்ட வழியென்றும் , குணமடைந்து என்னை நடக்கவைத்தால் முதலில் உன்னை வந்து தரிசிக்கிறேன் என்றும் , அன்னதானம் , அபிஷேகம் செய்கிறேன் என்றும் பிரார்த்தித்துக்கொண்டேன் .
டாக்டர்கள் குறித்தப்படியே சர்ஜரியும் நடந்து அனைத்தும் சுமூகமாகி ,  2 மாதங்களில் நடக்க ஆரம்பித்தேன் ! முதல் நடையாக கோவையில் சாயி நாதனின் திருக்கோயிலுக்கு சென்று என் பிரார்த்தனையை நிறைவேற்றி வந்தேன்.

இப்போது படியேறி இறங்குவதும் , பேருந்துகளில் பிரயாணிப்பதும். , விரும்பிய இடங்களுக்கு சென்று வருவதும் இறைவனின் அருளால், சாயி மகானின் அருளால் நடப்பதாகவே உணர்கிறேன் !

எப்போதும் துணையிருக்கிறார் குருவாக , துயர் துடைக்கிறார் என்கிறார் , விழி நீரை துடைத்தப்படியே !

கருணைக்கடலாக அத்வைதமும் , இஸ்லாமிய மரபையும் மக்களிடம் விளக்கி, அவதரித்த யோகி,சாயி மகான் இந்து முஸ்லீம் மக்களிடையே நட்புணர்வை வளர்க்க வந்த இறைத்தூதராகவே பார்க்கப்படுகிறார்.

மகான்கள் தந்த பொன்மொழிகளை பின்பற்றி , மனித வாழ்வின் முடிச்சினை முடித்திட , பிறப்பினை அறுத்திட கர்மப்பலன்களை அனுபவித்து மோட்சப்பேற்றினை அடைந்திடலாம் .

கலியுகத்தில் வாழும் வரமாக துவாரகாமாயியை சரணடைந்தால் துயர் நீங்குகிறது , துன்பம் அகல்கிறது. 

#சாயி_மார்க்கம் தீபாவளி மலரில் வெளிவந்த எனது கட்டுரை.